Sérstakur saksóknari hefur ákært Ingvar Vilhjálmsson, fyrrverandi framkvæmdastjóra markaðsviðskipta hjá Kaupþingi, fyrir að telja ekki fram til skatts tæplega hálfan milljarð króna árið 2008. Kemur þetta fram á vef Ríkisútvarpsins.
Samkvæmt ákæru vantaldi Ingvar fjármagnstekjur upp á rúmar 498 milljónir vegna tólf framvirkra gjaldmiðlasamninga við Kaupþing sem voru á gjalddaga á fyrri hluta árs 2008. Þannig er hann sakaður um að hafa komið sér undan að greiða tæplega 50 milljónir króna í skatt. Ingvar var árið 2011 dæmdur til að greiða Kaupþingi 2,6 milljarða króna vegna lána til hlutabréfakaupa.
Þá hefur ónefndur karlmaður á sextugsaldri verið ákærður fyrir að láta undir höfuð leggjast að telja fram rúmar 110 milljónir króna í fjármagnstekjur árin 2007 og 2008.
