*

fimmtudagur, 1. október 2020
Fólk 16. september 2020 18:09

Þóra Hrund tekur við stjórn ÍMARK

Samtök markaðsfólks á Íslandi ráða Þóru Hrund Guðbrandsdóttur sem framkvæmdastjóra. Annar eigandi Munum og Já Takk.

Ritstjórn
Þóra Hrund Guðbrandsdóttir starfaði áður sjálfstætt, en hún er jafnframt annar eigandi útgáfufyrirtækisins Munum og upplifunarfyrirtækisins Já takk.
Aðsend mynd

Þóra Hrund Guðbrandsdóttir hefur verið ráðinn nýr framkvæmdastjóri ÍMARK, samtaka markaðsfólks á Íslandi. ÍMARK eru samtök markaðsfólks á Íslandi, einstaklinga sem hafa áhuga á og/eða starfa við markaðsmál.

Áður starfaði Þóra Hrund sem sjálfstætt starfandi verkefnastjóri á sviðum markaðsmála, upplifunar- og viðburðahönnunar ásamt því að vera annar eigandi af útgáfufyrirtækinu MUNUM og upplifunarfyrirtækinu Já takk.

Þóra Hrund er með B.S. gráðu í viðskipta- og markaðsfræðum, og er að ljúka meistaranámi í stjórnun & stefnumótun og verkefnastjórn ásamt því að vera markþjálfi.

Heimsfaraldurinn prófraun fyrir markaðsfólk

Tilgangur samtakanna er að auka veg og virðingu markaðsmála hérlendis, stuðla að auknum skilningi á mikilvægi þeirra ásamt því að vera leiðandi afl, vettvangur þekkingar, tengsla og reynslu á sviði markaðsmála á Íslandi.

„Við bjóðum Þóru Hrund hjartanlega velkomna til ÍMARK. Við erum algjörlega í skýjunum með að fá hana í hópinn og mun reynsla hennar og hæfileikar reynast vel við að auka veg og virðingu markaðsmála hérlendis,“ segir Andri Már Kristinsson, formaður ÍMARK.

„Heimsfaraldurinn hefur reynst mikil prófraun fyrir markaðsfólk á Íslandi og mun ÍMARK leggja áherslu á að draga fram lærdóm síðustu mánuða og finna leiðir hvernig fyrirtæki og stofnanir geti lagað sig að gjörbreyttu landslagi. Þóra Hrund mun vinna að því að gera ÍMARK að aðgengilegu og virku samfélagi markaðsfólks á Íslandi með spennandi viðburðum og virkri umræðu um markaðsmál.“

Þóra Hrund segist sjálf vera ánægð og spennt fyrir nýja hlutverkinu.

„Einnig er ég spennt að fá að takast á við þær áskoranir sem við erum að fást við í breyttu umhverfi. Þetta breytta umhverfi felur líka í sér aukin tækifæri til að gera hlutina með öðrum hætti en áður og sé ég fyrir mér að ÍMARK ætti að vera samfélag markaðsfólks á Íslandi dag frá degi en ekki einungis í kringum viðburði ÍMARK sem hafa verið þungamiðja í starfi ÍMARK,“ segir Þóra Hrund.

„Við viljum skapa virði fyrir félagsmenn og búa til vettvang sem stuðlar að kröftugri umræðu um ábyrgt og metnaðarfullt markaðsstarf, efla tengsl félagsmanna og vera vettvangur til að miðla þekkingu, reynslu og því sem ber efst á baugi markaðsmála hverju sinni.“