Þrír af þeim fjórum sem sérstakur saksóknari hefur ákært vegna gruns um meinta markaðsmisnotkun í aðdraganda bankahrunsins mættu í fyrirtöku í Al Thani-málinu svokallaða í Héraðsdómi Reykjavíkur í dag. Fyrirtakan hófst klukkan kortér yfir eitt.
Hinir ákærður eru Hreiðar Már Sigurðsson, fyrrverandi bankastjóri Kaupþings, Magnús Guðmundsson, fyrrverandi bankastjóri Kaupþings í Lúxemborg, og Ólafur Ólafsson, löngum kenndur við Samskip en hann var á meðal stærstu hluthafa bankans. Sigurður Einarsson, fyrrverandi stjórnarformaður Kaupþings, mætti ekki við fyrirtökuna í dag. Hann mætti hins vegar einn í dómssal um miðjan mánuðinn þegar málið var fyrst á dagskrá og lýsti yfir sakleysi sínu.
Fjórmenningarnir eru sakaðir um markaðsmisntlkun og sýndarviðskipti í tengslum við kaup Al Thanis frá Katar á fimm prósenta hlut í Kaupþingi fyrir 25 milljarða króna örfáum dögum áður en ríkið tók hann yfir haustið 2008. Bankinn lánaði honum fyrir kaupunum og fóru peningarnir m.a. í gegnum félög Ólafs Ólafssonar.
Hér má sjá þá Hreiðar Má Sigurðsson og Ólaf Ólafsson ásamt verjendum sínum. Magnús Guðmundsson situr aftan við þá við hlið Gests Jónssonar lögmanns.