Ég vann á Hagstofu Íslands við gagnaöflun með háskólanámi og var síðan ráðin sérfræðingur á efnahagssviði Hagstofunnar að loknu námi. Þaðan var ég svo plötuð út í verkalýðsbaráttuna," segir Sigrún Ösp Sigurjónsdóttir, nýráðinn forstöðumaður Rannsóknaseturs verslunarinnar (RSV).
Hún starfaði sem verkefnastjóri og hagfræðingur fyrir fimm félög innan Bandalags háskólamanna og var síðar ráðin framkvæmdastjóri Félags íslenskra náttúrufræðinga. „Það má því segja að ég sé komin hinum megin við borðið, í Hús atvinnulífsins úr hinum enda Borgartúnsins þar sem verkalýðshreyfingin er til húsa," segir Sigrún og bætir við að henni hafi þótt fróðlegt að upplifa menningarmuninn þarna á milli. „Það er töluverð breyting að koma hingað yfir, þar sem skilvirknin er ótrúlega mikil," segir hún.
Sigrún virðist hafa lent á réttri hillu hjá RSV, en hún er mikill áhugamaður um verslun, gagnagreiningu og tölfræði. „Mér finnst ég alveg ofboðslega heppin að hafa dottið niður á þetta starf. Ég er mikið R nörd. Það er kannski skrítið að kalla R áhugamálið sitt, en þannig er það orðið," segir hún hlæjandi og bætir við:
„Ég er líka algjör toppneytandi, ég versla ótrúlega mikið og hreinlega elska netverslun. Það að geta verslað í matinn á netinu og fengið heimsendingu hefur verið mikil lífsgæðaaukning fyrir fjölskylduna."
Sigrún býr á Seltjarnarnesi með manninum sínum, Benóný Harðarsyni, og þremur börnum á aldrinum 2 til 17 ára.
Nánar er fjallað um málið í Viðskiptablaðinu. Áskrifendur geta nálgast blaðið undir Tölublöð , aðrir geta skráð sig í áskrift hér .