*

laugardagur, 4. desember 2021
Innlent 2. október 2021 15:04

Tvöföldun hleðslustöðva á næsta ári

Gangi áætlanir eftir mun fjöldi tengla við hraðhleðslustöðvar fyrir rafbíla tvöfaldast fyrir lok næsta árs.

Júlíus Þór Halldórsson
vb.is

Uppbygging hraðhleðslustöðva fyrir rafbíla hefur gengið hægar en til stóð síðustu misseri, en er þó komin á ágætis skrið.

Í dag er alls 91 hraðhleðslutengill á landinu öllu, þar af 57 af fyrstu kynslóð í einföldum 50kW stöðvum og 13 af annarri kynslóð í alls átta 150kW stöðvum, auk 21 tesla hraðhleðslutengla á 5 stöðum, sem flestir geta gefið 250kW hver. Til stendur að reisa 34 stöðvar þeim til viðbótar, með að minnsta kosti 76 tengla, á næstunni, en sé gert ráð fyrir 4 tenglum á hverri Tesla stöð verða þeir 91.

Síaukin þörf á fleiri og öflugri stöðvum
Þrátt fyrir tafir nýverið hefur uppbygging hraðhleðslunetsins gengið hratt síðustu ár, enda aðeins sjö ár síðan fyrsta slíka stöðin reis hér á landi.

Fyrstu kynslóðar stöðvarnar eru hins vegar komnar þónokkuð til ára sinna í tæknilegu tilliti í samanburði við þær nýjustu, sem geta hlaðið allt að sjöfalt hraðar, og tvo bíla í einu (þá skiptist aflið að vísu í tvennt).

Með stóraukinni rafbílaeign landsmanna síðustu ár er orðið afar þétt setið á köflum um gömlu 50kW-stöðvarnar, sem aðeins geta hlaðið einn bíl í einu og geta verið á annan klukkutíma að hlaða bíl með stóra rafhlöðu úr 10% í 80% – en eftir það fer að hægja verulega á hleðslunni og því almennt ekki ráðlagt að hlaða umfram það í hraðhleðslu.

Nýrri rafbílar eru í ofanálag farnir að geta tekið við hraðari hleðslu en þeir eldri. Árið 2019 gerði Orkusjóður samninga um veitingu styrkja upp á 227 milljónir króna fyrir uppsetningu 43 150kW stöðva. Stefnt var að því að flestar eða allar stöðvarnar yrðu komnar upp og í notkun á þessu ári, en heimsfaraldurinn og flækjustig við framkvæmd uppsetningar víðsvegar um landið hefur valdið þónokkrum töfum.

Styrkveitingar gætu runnið út
Í samtali við blaðamann hafa uppsetningaraðilar meðal annars kvartað yfir hægagangi hjá sumum orkuveitum, sem draga þurfa öflugar raflagnir á staðinn áður en hægt er að setja upp stöð, auk þess sem afhending búnaðarins sjálfs hefur í einhverjum tilfellum tafist.

Allir stefna þeir þó að því að klára uppsetningu þeirra stöðva sem ákveðið hefur verið að reisa á næsta ári hið síðasta, og talsmaður Orkusjóðs segist ætlast til þess að styrkþegar klári uppsetningu innan þess tíma, enda fari styrkveitingar að renna út.

Nánar er fjallað um málið í sérblaðinu Orka & Iðnaður. Áskrifendur geta nálgast blaðið undir Tölublöð, aðrir geta skráð sig í áskrift hér.