*

föstudagur, 21. janúar 2022
Fólk 6. desember 2021 17:10

Verður aðstoðarmaður Þórdísar Kolbrúnar

Þórlindur Kjartansson hefur verið ráðinn sem aðstoðarmaður utanríkis- og þróunarsamvinnuráðherra.

Ritstjórn
Þórlindur Kjartansson verður aðstoðarmaður Þórdísar Kolbrúnar Reykfjörð Gylfadóttur, utanríkis- og þróunarsamvinnuráðherra.
Aðsend mynd/eyþór

Þórdís Kolbrún Reykfjörð Gylfadóttir utanríkis- og þróunarsamvinnuráðherra hefur ráðið Þórlind Kjartansson í stöðu aðstoðarmanns ráðherra. Þetta kemur fram í tilkynningu frá utanríkisráðuneytinu. 

Þórlindur hefur starfað sjálfstætt undanfarin ár og veitt fjölda fyrirtækja og stofnana margvíslega þjónustu, einkum á sviði stefnumótunar og alþjóðlegra samningamála. 

Hann var framkvæmdastjóri rekstrar hjá Meniga á árunum 2012-2015 og stjórnarformaður Innovit-nýsköpunarseturs á árunum 2009-2012. Þar áður starfaði hann meðal annars við markaðsmál hjá Landsbankanum, sem blaðamaður hjá Fréttablaðinu, ráðgjafi fjármálaráðherra, textasmiður hjá Íslensku auglýsingastofunni og við eigin atvinnurekstur á sviði upplýsingatækni og miðlunar.

Þórlindur er með BA-gráðu í hagfræði frá Háskóla Íslands og ML-gráðu í lögfræði með sérstaka áherslu á alþjóðalög frá Háskólanum í Reykjavík.

Þórlindur var um árabil fastur pistlahöfundur á Fréttablaðinu. Auk þess hefur hann skrifað hundruð pistla um margvísleg málefni á vefritið Deigluna og þrjár bækur um íþróttir, í félagi við Eggert Þór Aðalsteinsson.

Þórlindur hefur jafnframt gegnt margvíslegum félags- og trúnaðarstörfum, var meðal annars formaður Vöku-félags lýðræðissinnaðra stúdenta, stjórnarformaður Félagsstofnunar stúdenta og formaður Sambands ungra sjálfstæðismanna.