i8 Gallery seldi nokkuð af listaverkum eftir Birgi Andrésson, Ólaf Elíasson og Ragnar Kjartansson á listaverkamessunni The Armory Show í New York í síðustu viku.
Auður Jörundsdóttir hjá i8 Gallery, sem kynnti listamennina þrjá á messunni, segir hana hafa gengið mjög vel og fengið mikla umfjöllun þar sem norrænn fókus var á messunni.
„Við seldum svolítið af verkum og fengum góð sambönd og svo er ýmislegt í vinnslu því að hlutirnir gerast oft ekki alveg strax.“
Hér að neðan má sjá tvö verk eftir þá Ólaf Elíasson og Birgi Andrésson auk myndbands um þátttöku Ragnar Kjartansson á Feneyjartvíæringnum fyrir þremur árum.
Verkið Endalokin eftir Ragnar Kjartansson var framlag Íslands til Feneyjartvíæringsins árið 2009. Verk Ragnar er tvíþætt. Annars vegar var um að ræða myndbanda- og tónlistarinnsetningu. Hinn hluti verksins fólst í því að Ragnar innréttaði istmálarastúdíó í fjórtándu aldar byggingu við Grand Canale-síkið. Þar málaði hann viðstöðulítið í hálft ár. Fyrirsætan var ætíð sú sama: maður í sundskýlu. Sá sötraði bjór og reykti á meðan Ragnar málaði hann.
