Þingflokkur Pírata hefur lagt fram þingsályktunartillögu á Alþingi um sjálfstætt eftirlit með starfsemi og starfsháttum lögreglu. Í tillögunni felst að Alþingi álykti að fela forsætisnefnd Alþingis að láta undirbúa lagafrumvarp um sérstaka stofnun á vegum Alþingis sem hafi sjálfstætt eftirlit með starfsemi og starfsháttum lögreglu.
Slík stofnun ætti samkvæmt tillögunni að hafa eftirfarandi verkefni:
- að hefja eftirlit að eigin frumkvæði,
- að taka við kærum einstaklinga sem telja lögreglu hafa brotið á réttindum sínum,
- að rannsaka meint brot lögreglumanna í starfi,
- að rannsaka tilkynningar innan úr lögregluliðum um einelti og kynferðislega áreitni,
- að rannsaka upplýsingar frá nafnlausum afhjúpendum innan lögreglu og stjórnsýslu.
Auk þess vilja Píratar að við undirbúning frumvarps verði metið hvort stofnunin geti einnig farið með ákæruvald í slíkum eftirlitsmálum. Í frumvarpinu verði kveðið sérstaklega á um sjálfstæði stofnunarinnar.