Það sem staðið hefur íslenskri fatahönnun fyrir dyrum er skort ur á gögnum og þekkingu og reynslu á framleiðslu. Þetta segir Margrét Sigrún Sigurðardóttir, lektor við viðskiptafræðideild Háskóla Íslands. Undir þetta er tekið í flestum fræðigreinum sem finna má frá íslenskum háskólum um íslenska fatahönnun.
14 milljarða velta
Margrét Sigrún kortlagði árið 2011 hagræn áhrif skapandi greina. Í skýrslunni kom fram að heildar velta skapandi greina var 189 milljarðar króna árið 2009. Þar af var hlutur ríkis og sveitarfélaga um 12,5%. Sé litið á virðisaukaskattskylda veltu þeirra greina sem teljast skapandi kemur í ljós að hönnun og aðrar skapandi þjónustugreinar veltu rúmum 14 milljörðum króna árið 2009 en undir þann flokk fellur fataframleiðsla. Nánari sundurliðun er vandfundin og er í gögnum Hagstofunnar og annarra sjaldnast gerður greinarmunur á innfluttum fatnaði og innlendri fataframleiðslu.
„Sú þekking sem þarf til að byggja iðnaðinn upp verður ekki til nema það séu nógu margir í bransanum að velta þessu fyrir sér,“ segir Margrét Sigrún. Hún bendir á að virðisaukaskattur hjálpi íslenskri fataframleiðslu ekki og að ekki sé gerður greinarmunur á því sem framleitt sé hérlendis eða flutt inn að utan.
Nánar er fjallað um málið í Viðskiptablaðinu. Áskrifendur geta nálgast blaðið undir liðnum tölublöð hér að ofan.