Úra- og skartgripaverslunin Klukkan hefur opnað nýja verslun í Kringlunni. Verslunarrýmið er staðsett beint gegnt Bónus, New Yorker og BOSS búðinni.
Fyrirtækið rekur einnig verslun og verkstæði að Nýbýlavegi 10 í Kópavogi ásamt netverslun. Klukkan segir að með þessu skrefi megi ætla að umfang fyrirtækisins tvöfaldist.
„Að sjá þetta litla fjölskyldufyrirtæki vaxa úr 15 fermetra plássi sem mamma og pabbi stofnuðu í Hamraborginni á sínum tíma í tvær nýjar stórglæsilegar verslanir á Nýbýlavegi og í Kringlunni er ótrúlega skemmtilegt. Viðtökurnar hjá Kringlugestum hafa verið frábærar fyrstu dagana, röð út úr dyrum þegar við opnuðum og helgin var frábær,” segir Hjördís Viðarsdóttir, verslunarstjóri Klukkunnar.
Klukkan er fjölskyldufyrirtæki sem stofnað var 1979 með kaupum Viðars Haukssonar og Katrínar Stefánsdóttur á lítilli verslun í Hamraborg og hefur starfað sleitulaust síðan í eigu sömu fjölskyldu. Þess má geta að þriðji ættliðurinn stendur nú vaktina undir vökulum augum kynslóðanna á undan í verslununum sem eru nú 3 talsins.
„Það er mikið fagnaðarefni að fá þetta gamalgróna verslunarfyrirtæki í Kringluna, stærstu verslunarmiðstöð landsins. Klukkan er frábær viðbót við þá flóru verslana sem hér er,“ segir Inga Rut Jónsdóttir, framkvæmdastjóri Kringlunnar.
Verslunin er byggð upp í sama stíl og nýja verslun Klukkunnar á Nýbýlavegi en innréttingar eru hannaðar og smíðaðar af þýska framleiðandanum ODS sem hefur meðal annars starfað fyrir merki eins og Casio og Tommy Hilfiger.
