Mariam Laperashvili hefur verið ráðin framkvæmdastjóri markaðsmála hjá fjártæknifyrirtækinu Standby.
Þetta kemur fram í fréttatilkynningu en undanfarin tvö ár hefur Mariam starfað sem forstöðumaður markaðs- og samskiptamála fjölmiðla Sýnar þar sem hún leiddi öll kynningarmál Stöðvar 2, Vísis, Stöð 2 sport, Bylgjunnar, FM957 og X977.
Mariam er viðskiptafræðingur að mennt, lauk B.Sc. námi frá Háskóla Íslands og stundaði einnig nám við George Washington University þar sem hún sérhæfði sig í markaðsfræðum.
Mariam hefur víðtæka reynslu í fjölmiðlum, sölu, stafrænni þróun og markaðsmálum og hefur yfir árin unnið hjá íslenskum fyrirtækjum eins og Sagafilm, Reon og Tulipop og bandarískum félögum WorkAmerica og National Geographic.
Standby er bandarískt fjártæknifyrirtæki sem veitir bankaábyrgðir vegna leigu á íbúðarhúsnæði. Bankaábyrgðir eru algengar í Evrópu og á Íslandi, en ekki í Bandaríkjunum, og er því fyrirtækið að veita þjónustu sem er þrautreynd en á nýjum markaði. Varan heitir „Standby Deposit“ og er í boði í öllum fylkjum Bandaríkjanna í samstarfi við stóran fjártæknibanka í New York.
„Við erum virkilega spennt að fá Mariam með okkur í lið. Hún er virkilega reynslumikil og mun hjálpa okkur að verða enn skarpari í markaðssetningu og styrkja teymið okkar. Við erum búin að byggja upp fjölþjóðlegt teymi sem hefur þróað vöruna, selt hana og þjónustar. Félagið hefur starfsstöðvar í Bandaríkjunum, Íslandi og í Póllandi. Við erum að finna mikinn meðbyr frá leiguþjónustufyrirtækjum, sem svo bjóða sínum leigjendum að nota okkar vöru. Við náum að einfalda vinnu fasteignafélaga og bjóða leigjendum upp á betri upplifun. Mariam mun spila lykilhlutverk í þeirri stóru markaðssókn sem er í gangi hjá Standby,“ segir Egill Almar Ágústsson forstjóri Standby og meðstofnandi.
„Ég er spennt að takast á við verkefni sem eru fram undan hjá okkur í Standby. Varan okkar er tæknilega flókin en einfaldar líf milljóna manna og er því mikilvægt samfélagsverkefni í sjálfu sér líka. Hjá Standby er mikið af reynslumiklu fagfólki og það er tilhlökkunarefni að vera hluti af þessari liðsheild,” segir Mariam sem hefur nú þegar hafið störf.
