Atorka Group-samstæðan tapaði 56,4 milljörðum króna á árunum 2008 og 2009 og eigið fé félagsins var neikvætt um 34,4 milljarða króna í lok árs 2009. Þetta kemur fram í ársreikningi móðurfélags samstæðunnar sem skilað var inn til ársreikningaskráar 21. desember síðastliðinn.
Félagið leitaði nauðasamninga á síðari hluta ársins 2009 og kröfuhafar þess tóku það yfir í febrúar í fyrra. Stóru viðskiptabankarnir þrír og skilanefnd Glitnis eiga um 70% í félaginu.
Í nauðasamningum Atorku fólst að hlutafé félagsins var fært niður að fullu og kröfuhafar breyttu 92% af kröfum sínum í hlutafé. Afgangi krafnanna var breytt í nýtt skuldabréf sem var útgefið af Atorku Group. Auk þess fengu kröfuhafarnir sameiginlega peningagreiðslu upp á 250 þúsund krónur.
Nánar er fjallað um málið í Viðskiptablaðinu. Áskrifendur geta nálgast blaðið hér að ofan undir Tölublöð.