Að mati greiningardeildar Íslandsbanka hefur hægfara styrking einkennt þróun krónu það sem af er ári og sveiflur hafa verið með minna móti.
„Framvirk stöðutaka með krónu hefur sótt í sig veðrið og kaup erlendra aðila á ríkisbréfum hafa vegið upp erlendar fjárfestingar lífeyrissjóða en á sama tíma hefur líklega nokkur halli verið á vöru- og þjónustuviðskiptum,” segir Jón Bjarki Bentsson aðalhagfræðingur Íslandsbanka.
Að mati greiningardeildarinnar er áframhaldandi styrking líklegri en veiking á komandi fjórðungum.
En undanfarnar vikur hefur óvissa um utanríkisviðskipti ársins hafi aukist.
Segir í greiningu bankans að frá áramótum fram til upphafs dymbilvikunnar styrktist krónan gagnvart helstu gjaldmiðlum um 1,4% ef miðað er við gengisvísitölu Seðlabankans.
„Virðist þetta hægfara styrkingarferli vera framhald á þróun sem hófst í lok nóvember í fyrra eftir töluverða veikingarhrinu frá septemberbyrjun. Þá hefur flökt í krónunni verið með minna móti og bendir það til þess að þokkalegt jafnvægi sé í gjaldeyrisflæði til og frá landinu,” segir Jón Bjarki.
Í fjármálastöðugleika Seðlabanka Íslands var fjallað um þróun á framvirkri gjaldeyrisstöðu bankanna, sem er spegilmynd af stöðutöku viðskiptavina þeirra. Þar segir að samhliða 37 ma. kr. lækkun í hreinni framvirkri gjaldeyrisstöðu bankanna (og þar með stöðutöku með krónunni hjá viðskiptavinum þeirra) hafi framvirkum samningum með krónuna fækkað um 40%.
„Bendir það til þess að margir á markaði hafi lokað stöðum sínum á seinni hluta þriðja ársfjórðungs eftir talsverða aukningu á fyrri helmingi ársins,” segir Jón Bjarki.
Hrein framvirk gjaldeyrisstaða náði lágmarki í 137 milljörðum í nóvemberlok en jókst að nýju um 12 milljarða frá desemberbyrjun til loka janúar.