*

laugardagur, 22. febrúar 2020
Erlent 16. desember 2019 10:20

Gætu stöðvað framleiðslu 737 Max

Stjórn Boeing íhugar að láta stöðva framleiðslu 737 Max flugvélanna þar til þeim verður hleypt aftur í háloftin.

Ritstjórn
Boeing 737 Max flugvélarnar hafa verið kyrrsettar frá því í mars.
epa

Stjórn Boeing íhugar nú að láta stöðva tímabundið framleiðslu 737 Max flugvéla félagsins sem hafa verið kyrrsettar frá því í mars. Seattle Times greinir frá.

Búist er við að greint verði frá ákvörðun félagsins síðar í dag eða á þriðjudagsmorgun Vestanhafs.

Ef af verður, er ráðgert að framleiðsla stöðvist þar til bandarísku flugmálayfirvöldin FFA taka ákvörðun um að hleypa vélunum aftur í loftið. Nú er búist við að það geti gerst um miðjan febrúar eða í byrjun mars.

Á föstudaginn bað forstjóri FAA um að forstjóri Boeing myndi hætta að gefa út yfirlýsingar um hvenær von væri á Max flugvélunum aftur í háloftin. Kyrrsetningin hefur varað mun lengur en stjórnendur Boeing bjuggust við í upphafi. Icelandair gerir ekki ráð fyrir flugvélunum inn í sitt leiðakerfi fyrr en í fyrsta lagi þann 1. mars 2020.

Stikkorð: Boeing 737 Max