Hlutabréfaverð stærstu flugfélaga Evrópu hefur lækkað töluvert í dag eftir að olíuverð rauk snögglega upp eftir árás Ísrael á Íran í nótt.
Verðið á Brent hráolíu, sem er meðal annars notað í eldsneyti, hækkaði um 4% en olíuverðið hefur síðan náð jafnvægi með deginum.
Gengi IAG, móðurfélags British Airways, opnaði 2,8% lægra í kauphöllinni í Lundúnum í morgun. Ryan Air opnaði 1,6% lægra, Easy Jet 2,1% lægra, Wizz air 2,1% og Ari France 2,4%.
Á sama tíma hefur hlutabréfaverð Icelandair lækkað um 2,3% hér heima og stendur gengið í 1,06 krónum. Engin viðskipti hafa verið með bréf Play það sem af er degi.
Gengi evrópsku flugfélaganna hefur hækkað örlítið að nýju með viðskiptum dagsins samhliða olíuverðinu.
Kathleen Brooks, yfirmaður greiningardeildar XTB, segir í samtali við viðskiptablað The Guardian að alþjóðastjórnmálin séu að nýju byrjuð að spila lykilhlutverk í markaðshreyfingum.
