Húrra Reykjavík mun opna nýja verslun í brottfararsal Keflavíkurflugvallar í vor.
Samkvæmt tilkynningu frá Isavia mun verslunin bjóða upp á úrval af fatnaði og skóm frá vinsælum vörumerkjum fyrir gesti á leið sinni úr landi.
„Húrra Reykjavík hefur notið gífurlegra vinsælda frá upphafi og er orðin rótgróinn hluti af verslunarflóru miðborgarinnar enda kennir þar ýmissa grasa. Verslunin á KEF verður engin undantekning en þar verður hægt að næla sér í fatnað frá vinsælum vörumerkjum á borð við Norse Projects, Carhartt WIP, Sporty & Rich, Reykjavík Roses, Crocs, Arc´teryx, Salomon og Stone Island,“ segir tilkynningu Isavia.
Hönnun verslunarinnar er í höndum HAF Studio og mun endurspegla afslappað og hlýlegt andrúmsloft, svipað og í verslun Húrra Reykjavík á Hverfisgötu. Sérvalin tónlist mun skapa skemmtilega stemningu fyrir gesti á leið í fríið.
„Við erum að stíga stór skref með opnun þessarar nýju og glæsilegu verslunar, sem á sér stað í tilefni af 10 ára afmæli fyrirtækisins. Þetta er spennandi tímabil fyrir Húrra,“ segir Sindri Snær Jensson, annar eigenda Húrra Reykjavík. „Við munum halda áfram að bjóða íslenskum sem erlendum viðskiptavinum vandaðan fatnað og strigaskó, allt undir áhrifum frá skandinavískri götutísku.“
Isavia segir að með opnun þessarar nýju verslunar eykst fjölbreytileikinn enn í verslun og þjónustu á KEF, sem er sífellt mikilvægara nú þegar 21 þúsund gestir fara að meðaltali um völlinn á degi hverjum.
„Við erum ánægð með að Húrra Reykjavík, sem er skemmtileg og flott verslun, bætist í hóp verslana á flugvellinum. Þetta mun án efa gera KEF að enn áhugaverðari viðkomustað fyrir gesti sem vilja gera góð kaup,“ segir Gunnhildur Erla Vilbergsdóttir, deildarstjóri verslunar og veitinga hjá Isavia.
