Félögin Álfakór og Innís, sem áður fóru fyrir 50% hlut í Samhentum Kassagerð hf., hafa, í gegnum einkahlutafélagið ML10 ehf., aukið við eignarhlut sinn í félaginu með kaupum á hlutafé Ásgeirs Þorvarðarsonar og Bjarna Hrafnssonar.
Innís er meðal annars í eigu Jóhanns Oddgeirssonar, framkvæmdastjóra Samhentra Kassagerða. Álfakór er í eigu Birnu Loftsdóttur, Lofts Bjarna Gíslasonar og Sólveigu Birnu Gísladóttur en félögin hafa nú eignast Samhentir Kassagerð að fullu.
Bjarni, var einn upphaflegra stofnenda Samhentra árið 1995, og Ásgeir, fráfarandi stjórnarformaður félagsins. Í tilkynningu um kaupin segir að þeir hafi báðir gegnt lykilhlutverki í uppbyggingu og vexti félagsins á umliðnum árum og það er félaginu mikilvægt að Bjarni muni áfram verða félaginu til ráðgjafar næstu 12 mánuðina eftir kaupin.
Kaupin eru gerð með fyrirvara um samþykki Samkeppniseftirlitsins. Eldjárn Capital var ráðgjafi seljenda í viðskiptunum en fyrirtækjaráðgjöf Arion banka annaðist ráðgjöf við kaupendur.
„Við erum bjartsýn á framtíð fyrirtækisins og stefnum að því að veita áfram bestu umbúðarlausnir fyrir íslenska markaðinn,“ segir Jóhann, sem þakkaði jafnframt Bjarna og Ásgeiri fyrir þeirra framlag í uppgangi félagsins í gegnum tíðina.
Líkt og Viðskiptablaðið greindi frá um miðjan mars þá gekk félagið frá samkomulagi um kaup á Formar ehf. en hið síðarnefnda er nýtt félag sem var stofnað utan um reksturinn á frauðplastdeild Borgarplasts að Ásbrú í Reykjanesbæ eftir söluna á hverfisteypuverksmiðju til Umbúðamiðlunar.
Umbreyting, framtakssjóður í rekstri Alfa Framtaks, keypti Borgarplast og Plastgerð Suðurnesja árið 2018.
Kaupverðið er ekki gefið upp í viðskiptunum en samkvæmt heimildum Viðskiptablaðsins var velta Formars ehf. um 500 milljónir í fyrra.
„Formar framleiða frauðplastskassa og einangrun fyrir íslenska markaðinn en það eru vörur sem við höfum til þessa ekki getað boðið upp á í okkar vörulínu. Við erum spenntir fyrir því að geta breikkað út vörulínu okkar og boðið frauðplastslausnir til okkar viðskiptavina,“ segir Jóhann.
Tekjur um 7 milljarðar árið 2022
Samhentir Kassagerð hagnaðist um 431 milljón króna árið 2022 eftir að hafa hagnast um 339 milljónir árið áður.
Rekstrartekjur námu 6,8 milljörðum og jukust um 11% milli ára.
Í skýrslu stjórnar í ársreikningi segir að reksturinn hafi gengið vel og í samræmi við áætlanir. Bent er á að EBITDA hafi batnað um 202 milljónir milli ára.