*

föstudagur, 26. febrúar 2021
Fólk 17. febrúar 2021 11:58

Nýir meðeigendur hjá GG Verk

Brynhildur S. Björnsdóttir og Brynja Blanda Brynleifsdóttir taka sæti í stjórn byggingarfélagsins en konur eru nú í meirihluta stjórnar.

Ritstjórn
Brynhildur S. Björnsdóttir, Helgi Gunnarsson og Brynja Blanda Brynleifsdóttir eru eigendur GG Verk.
Aðsend mynd

Brynhildur S. Björnsdóttir og Brynja Blanda Brynleifsdóttir eru nýir meðeigendur í byggingarfyrirtækinu GG Verk ehf og taka strax sæti í stjórn félagsins.

Helgi Gunnarsson stofnaði GG Verk ásamt bróður sínum Gunnari Gunnarssyni árið 2006 en Gunnar hefur nú ákveðið að færa sig yfir í tengt félag í eigu þeirra bræðra og selur um leið helmingshlut sinn í GG Verk til nýrra hluthafa. Helgi verður áfram framkvæmdastjóri félagsins og á sæti í stjórn. Sameiginlegur hlutur hans og Brynhildar nemur 90% eignarhlutfalli á móts við 10% hlut Brynju.

Brynhildur S. Björnsdóttir starfaði sem framkvæmdastjóri félagsins á árunum 2014-2019 en hún hefur nú gerst stjórnarformaður félagsins. Hún er með M.Sc. gráðu í stefnumiðaðri stjórnun og lýkur framhaldsnámi í Harvard Business School síðar á árinu. Hún lét nýverið af störfum sem stjórnarformaður Sjúkratrygginga Íslands en hún situr í stjórnum fleiri félaga.

Brynja Blanda hefur starfað sem fjármála- og aðstoðarframkvæmdastjóri félagsins frá því snemma á árinu 2020 en hún starfaði áður við fjármála- og stjórnunarstörf hjá Egilsson ehf/A4, Sjöstjörnunni/Subway, Latabæ ofl. Hún er viðskiptafræðingur að mennt og hefur jafnframt lagt stund á MBA nám. Brynja hefur áralanga reynslu af stjórnarsetu og sat m.a. í stjórn Egilsson ehf/A4 á árunum 2013-2017 og nú í Uniconta Ísland ehf.

GG Verk verður 15 ára á árinu og hefur fest sig í sessi í hópi stærstu byggingarverktaka á landinu. Félagið hlaut alþjóðlega ISO9001 gæðavottun árið 2015 og var þar með annar byggingarverktakinn á landinu til að ná þeim áfanga.

Stikkorð: Verk GG