Smyril Line Ísland hagnaðist um um 878 milljónir króna í fyrra sem er næstum helmingi meiri hagnaður en árið á undan þegar félagið hagnaðist um 455 milljónir.
Samkvæmt rekstrarreikningi námu tekjur flutningafyrirtækisins 13,7 milljörðum króna á árinu sem er hækkun úr 11,5 milljörðum árið áður. Rekstrarhagnaður jókst töluvert milli ára og fór úr 456 milljónum í næstum 1,2 milljarða.
Eignir félagsins í árslok voru um 2 milljarðar króna og skuldir um 406 milljónir. Eigið fé var 1,6 milljarðar og eiginfjárhlutfall 80%.
„Umsvif Smyril Line Ísland ehf. héldu áfram að aukast á árinu með auknum flutningnum, en félagið hélt áfram að auka markaðshlutdeild sína og umfang í rekstri. Þrátt fyrir miklar hækkanir á rekstrarkostnaði leiguskipa á árinu hefur félagið sýnt góðan árangur hvað varðar kostnaðarhagfræði líkt og afkoman ber með sér,“ segir í ársuppgjöri.
Auka starfsemina í Þorlákshöfn
Félagið gerir ráð fyrir að starfsemin á árinu 2024 verði með sambærilegum hætti og í fyrra en áætlað er að félagið muni auka starfsemina í Þorlákshöfn með því að hefja byggingu nýrrar vöru- og þjónustubyggingar.
Færeyska félagið p/f Smyril Line á 100% eignarhlut í félaginu en stjórn leggur til að greiddur verði út arður að upphæð 430 milljónir króna í ár.