Fimm manna stjórn hjá Ísfélaginu verður sjálfkjörin á aðalfundi útgerðarfélagsins á miðvikudaginn, 17. apríl, að því er kemur fram í tilkynningu til Kauphallarinnar.
Ein breyting verður aðalstjórn félagsins en stjórnarformaðurinn Gunnlaugur Sævar Gunnlaugsson gefur ekki kost á sér til áframhaldandi stjórnarsetu. Gunnlaugur hefur setið í stjórn félagsins frá árinu 1991.
Sigríður Vala tekur sæti í stjórninni
Sigríður Vala Halldórsdóttir tekur sæti í stjórn Ísfélagsins í stað Gunnlaugs. Stjórn Ísfélagsins verður því skipuð eftirtöldum einstaklingum:
- Einar Sigurðsson
- Guðbjörg Matthíasdóttir
- Gunnar Sigvaldason
- Steinunn H. Marteinsdóttir
- Sigríður Vala Halldórsdóttir
Sigríður Vala starfar sem framkvæmdastjóri fjármála og upplýsingatækni hjá Sjóvá þar sem hún hefur starfað frá árinu 2016, áður sem forstöðumaður hagdeildar. Hún starfaði hjá Creditinfo árin 2015-2016 sem forstöðumaður viðskiptastýringar og 2008-2015 í fyrirtækjaráðgjöf Íslandsbanka. Hún sat í stjórnum HS Veitna árin 2014-2022 og Sýnar á árunum 2019-2022. Hún situr í dag í stjórn Viðskiptaráðs Íslands.
