*

fimmtudagur, 6. ágúst 2020
Erlent 2. júlí 2020 15:20

Telur að auglýsendur snúi fljótt aftur

Mark Zuckerberg segir að Facebook muni ekki breyta sinni stefnu eða nálgun þrátt fyrir sniðgöngu auglýsenda.

Ritstjórn
Mark Zuckerberg, forstjóri Facebook
epa

Mark Zuckerberg, forstjóri Facebook, virðist ekki hafa áhyggjur af tímabundinni sniðgöngu auglýsenda á samfélagsmiðlinum. Fjölmörg fyrirtæki hafa tekið þátt í herferðinni #StopHateForProfit sem felst í að stöðva auglýsingaherferðir á samfélagsmiðlum vegna hatursorðræðu á stafrænum verkvöngunum (e. digital platforms). 

„Mín spá er að öll þessi fyrirtæki munu bráðlega snúa aftur til verkvangsins,“ á Zuckerberg að hafa sagt við starfsmenn fyrirtækisins. „Við ætlum ekki að breyta okkar stefnum og nálgun vegna ógnar á litla prósentu af tekjunum okkar.“ 

Facebook hefur staðfest ummæli Zuckerberg sem voru lekin á vefsíðu fréttaveitunnar The Independent. Fyrirtækið tilkynnti einnig að Zuckerberg muni funda með skipuleggjendum herferðarinnar, að því er segir í frétt BBC.

Fyrirtæki sem hafa tímabundið hætt að auglýsa á samfélagsmiðlum eru meðal annars Unilever, Verizon, Adidas, Coca-Cola, Ford og HP. Um þriðjungur fyrirtækja sem tóku þátt í könnun Alþjóðasamtaka auglýsenda sögðust ætla eða væru líkleg til þess að taka þátt í herferðinni. 

Stikkorð: Facebook Mark Zuckerberg