Benedikt Jóhannesson, fjármála- og efnahagsráðherra, er sannfærður um að greiðar samgöngur séu besta byggðastefnan. Þar með talin eru jarðgöng, ferjur og flug að mati Benedikts. Þetta skrifar hann á Facebook síðu sína og deilir pistli Ívars Ingimarssonar, um ójafnvægi á milli höfuðborgar og landsbyggðar þegar kemur að samgöngumálum.
Ráðherrann skrifar að með því að líta á flug sem almenningssamgöngur fyrir þá sem sem búa fjarri höfuðborgarsvæðinu áynnist margt. „Flugferðir urðu tíðari og hagkvæmari. Þannig yrði ferðaþjónustan sterkari á þessum svæðum. Ungt fólk sem vill nýta sér kosti þess að búa á landsbyggðinni gæti notið þjónustu og menningar á höfuðborgarsvæðinu mun tíðar. Margir telja að slíkt tal sé landsbyggðarvæl, en það er einfaldlega góður bisness að fólk vilji búa annars staðar en í Reykjavík,“ skrifar fjármála- og efnahagsráðherra. Að lokum bætir hann við að þannig sé hægt að byggja upp ferðaþjónustu og ýmiss konar iðnað tengdan sjávarútvegi víð um landið.
Vill gera innanlandsflug að almenningssamgöngum
Í grein Ívars Ingimarssonar, sem var meðal annars þekktur knattspyrnumaður, sem birtist á vefmiðlinum Kjarnanum , talar hann fyrir því að það þurfi að byggja upp sterka byggðakjarna í hverjum fjórðungi sem hafa gott aðgengi að höfuðborginni. Hann skrifar um skosku leiðina, þar sem að innanlandsflug er gert að almenningssamgöngum. „Að gera innanlandsflug að almenningssamgöngum eins og gert er í Skotlandi er einföld og fljótleg leið til að stuðla að þessu jafnvægi, slíkt aðgerð mun styrkja þá byggðarkjarna sem nú þegar hafa sýnt sig að fólk vill búa á,“ skrifar Ívar Ingimarsson.
