*

fimmtudagur, 14. nóvember 2019
Innlent 14. október 2019 21:01

USi, Valitor og TravelCo bíta fast

Aflögð starfsemi og eignir til sölu hafa þriggja milljarða neikvæð áhrif á afkomu Arion banka á þriðja ársfjórðungi.

Ritstjórn
Benedikt Gíslason , bankastjóri Arion banka.
Aðsend mynd

Neikvæð áhrif af aflagðri starfsemi og eignum til sölu á afkomu Arion banka á þriðja ársfjórðungi 2019 mun nema um 3 milljörðum króna, að teknu tilliti til skatta. Þetta kemur fram í afkomuviðvörun sem bankinn sendi frá sér fyrr í kvöld. Aflögð starfsemi til sölu nær til eigna eða félaga sem bankinn hyggst selja á næstu mánuðum og flokkast í rekstrarreikningi neðan við hagnað af áframhaldandi starfsemi.

Aukið tap Arion á fjórðungnum skýrist af þremur þáttum:

Vegna erfiðra markaðsaðstæðna, m.a. lágs sílikonverðs á heimsmarkaði hafa eignir Stakksbergs, eignarhaldsfélag um United Silicon (USi) sílikonverksmiðjuna í Helguvík, verið færðar niður um 1,5 milljarða en félagið er í söluferli. Unnið hefur verið að undirbúningi sölu verksmiðjunnar m.a. með umhverfismati og nýjum samningum við orkufyrirtæki að því er segir í afkomuviðvöruninni. 

Vegna erfiðleika í ferðaþjónustu telur Arion ástæðu til að niðurfæra eignir TravelCo um 600 milljónir króna. Frá yfirtöku bankans á rekstri ferðaskrifstofanna sem heyra undir TravelCo hefur undirbúningi og söluferli miðað áfram og stefnt er að sölu þeirra á komandi mánuðum. TravelCo var stofnað í október 2018 og tók yfir ferðaskrifstofur í eigu Primera Travel Group í kringum gjaldþrot flugfélagsins Primera Air en Samkeppniseftirlitið heimilaði bankanum í dag að eiga félagið en er þó gert að selja félagið innan ákveðins tímafrests. TravelCo tók þá einnig yfir skuldir Primera Travel Group við Arion banka, sem var viðskiptabanki samstæðunnar. Ekki kemur fram í tilkynningunni í hverju erfiðleikar í ferðaþjónustu felast en leiða má líkur að því að gjaldþrot Thomas Cook nýverið hafi haft slæm áhrif á allan ferðaskrifstofumarkaðinn. 

Þá hefur eign Arion banka í Valitor einnig verið færð niður vegna aukins tap í starfsemi félagsins sem er einkum tilkomið vegna kostnaðar við fækkun starfsfólks og skipulagsbreytinga í lok september en kostnaður við aðgerðirnar nam rúmlega 200 milljónum króna. Áhrif Valitor á aflagða starfsemi og eignir til sölu nema hins vegar samtals um 900 milljónum króna. Valitor hefur verið í söluferli frá því fyrr á þessu ári en bandaríski fjárfestingarbankinn Citi hefur umsjón með sölunni.

Stikkorð: Arion banki Valitor United Silicon Stakksberg TravelCo USi