*

sunnudagur, 25. júlí 2021
Erlent 7. desember 2012 09:15

Zynga sækir um leyfi til að stunda fjárhættuspil

Tölvuleikjaframleiðandinn Zynga þarf að auka tekjur sínar og hefur hafist handa við að fá svokallað spilaleyfi frá Nevada ríki.

Ritstjórn

Tölvuleikjaframleiðandinn Zynga hefur hafist handa við uppfylla skilyrði til að geta sótt um leyfi til að stunda fjárhættuspil frá Nevada ríki í Bandaríkjunum. Þetta kemur fram í frétt BBC um málið. Zynga hefur meðal annars þróað leikinn Farmville sem slegið hefur í gegn á Facebook.

Fyrsta stig á ferlinu hjá Spilaeftirliti Nevada (e. Nevada Gaming Board) tekur allt að 18 mánuði en eftir það getur fyrirtækið sótt um spilaleyfi.

Í frétt BBC segir að Zynga stefni á að koma með leiki í Bretlandi á næsta ári þar sem notast verður við alvöru peninga. Fyrirtækið hefur átt í erfiðleikum með að finna auknar tekjur að undanförnu og þarf að treysta að miklu leyti á tekjur frá Farmville og Words for Friends. Um 80% tekna fyrirtækisins koma í gegnum Facebook.

Fyrirtækið hefur ekki greint frá því hvað það ætli sér að gera við spilaleyfið frá Nevada. Bandarísk lög neita í dag bönkum og greiðsluþjónustum um að þjónusta þá sem beina viðskiptum sínum að bandarískum þegnum þegar kemur að spilun á netinu.

Stikkorð: Zynga Farmville