Það er áberandi að þegar Framsóknarmenn voru í forsætisráðuneytinu voru keyptir bílar frá Véladeild Sambandsins. Eða alveg þangað til Sambandið fór á hausinn og amerískar drossíur fóru úr tísku. Sjálfstæðismennirnir voru hins vegar á þýskum bílum. Okkur hefur tekist að taka saman sögu bíla forsætisráðherra aftur til 1974.
Það er hins vegar dýpra á bílakosti Ólafs Jóhannessonar sem var í forsæti 1971-1974. En það má þó eiginlega slá því föstu að hann var keyptur hjá Sambandinu. Í Véladeildinni.
Oldsmobile Regency 1986-1987 og 1988-1991
Steingrímur lét forsætisráðuneytið kaupa nýjan Oldsmobile Regency árið 1986 en það virðist hafa verið eftir að ráðherrabíll hans lenti í árekstri með eiginkonu hans um borð.
Steingrímur tók bílinn með sér í utanríkisráðuneytið í 16 mánuði, þegar Þorsteinn Pálsson varð forsætisráðherra, en sneri til baka á Oldsmobile-num og endaði ráðherratíð sína með hann í þjónustu sinni.
Audi 200 1987-1988
Þorsteinn Pálsson lét kaupa bílinn, sem var blár að lit, þegar hann var fjármálaráðherra sumarið 1986 og tók hann með sér í forsætisráðuneytið ári seinna.
Audi hafði þá aldrei verið áður í þjónustu forsætisráðuneytsins. Audi 200 var fínni gerð af Audi 100, var með stærri vél og betur búinn.
En Audi var ekki lengi í Paradís. Þorsteinn sagði af sér embætti haustið 1988 og Audi-inn fór til Jóns Baldvins í utanríkisráðuneytið.
Jeep Cherokee Limited og Oldsmobile 1988 - 1991
Eins og áður sagði notaði Steingrímur Hermannsson Oldsmobile bifreiðina áfram. Hann ákvað hins vegar 1. apríl 1990 að hefja notkun á eigin bíl af gerðinni Cherokee Limited 1987 og fékk greiddan bensínkostnað, háan viðhaldsreikning og afskriftir af bílnum. Notaði Steingrímur jeppann þá 11 mánuði sem hann átti eftir í sæti forsætisráðherra. Bílnum var ekið af bílstjóra Steingríms.
Við höfum ekki upplýsingar hvort Steingrímur keypti bílinn á ráðherrakjörum.
Oldsmobile bíllinn var þó einnig notaður áfram, eða eins og sagði í svari til Pressunnar, sem birtist árið 1991, „notuð til að létta af bifreið ráðherrans verkefnum og til einstakra ferða“.
Umfjöllun um fleiri ráðherrabíla má finna í blaðinu EV - Bílar sem kom út í síðustu viku. Áskrifendur geta lesið greinina í heild hér.
