Bandaríski fréttamiðillinn Wall Street Journal hefur nýlega tekið saman nokkur hátæknihótel sem sérhæfa sig í að bjóða upp á besta nætursvefn til gesta sinna í Bandaríkjunum. Hótelin eru sérhönnuð með sérstakri lýsingu, hljóðeinangrun og sum bjóða meira að segja upp á kolviðardrykki.
Eitt af þessum hótelum er Equinox Hotel sem staðsett er í New York og opnaði fyrst árið 2019. Eigendur hótelsins sögðust hafa eytt tveimur árum í að vinna með svefnsérfræðingum í að koma fyrir hitastillandi dýnum, hljóðeinangruðum veggjum og mismunandi líkamsræktarplönum fyrir hvert og eitt herbergi.
Sjónvörpin í herbergjunum eru öll hlaðin hugleiðslumyndböndum og í hverju herbergi má einnig finna svokallaðan „svefnmatseðil“ þar sem hægt er að panta drykki með ashwaghanda (efni sem er sagt bæta svefn) og viðarkol.
Á heilsubar herbergjanna geta gestir einnig gætt sér á CBD-olíu og magnesíumkremi eða bara dregið út jógamottuna og farið í fósturstellingu.
Ein nótt á þessu hóteli fyrir slíka upplifun kostar í kringum þúsund Bandaríkjadali en þeir gestir sem tvöfalda þá upphæð geta fengið herbergi sem innihalda kryo- og hljóðbylgjumeðferðir.
Fyrir þá sem vilja heimsækja Havaí og eru tilbúnir að greiða 1.785 dali fyrir eina nótt þá er einnig hægt að bóka sig á Sensei Lanai-hótelið í borginni Lanai. Hótelið býður upp á fimm kvölda dagskrá „hvíldar og endurnæringar“ þar sem svefn gesta er mældur með stafrænum hætti og aðstoða svo sérfræðingar innanhúss við að hámarka svefn gesta.
The Springs Resort í Pagosa Springs í Colorodo-ríki býður gestum upp á kvöldsturtu í náttúrulega baðlóni hótelsins og eftir á er hægt að skella sér í jógatíma meðan símanum er skellt í „svefnpoka“ svo hann trufli ekki nætursvefninn.
Miami er ekki aðeins borg fyrir sólþyrsta ferðalanga heldur er líka hægt að innrita sig á The Carillon-hótelið. Þar geta gestir flotið í saltbaði eða geimaldarhugleiðslubelg sem inniheldur mismunandi hljóðmeðferðir.
