Bandaríski lögmaðurinn John Van de North hefur gengið til liðs við lögmannsstofuna BBA//Fjeldco sem eigandi og mun starfa á skrifstofu félagsins í Mayfair í London.
John hefur búið og starfað í London síðan 1998 og býr að 25 ára reynslu af ráðgjöf á sviði einkafjármögnunar og áhættufjármögnunar í tengslum við stór alþjóðleg fjárfestingar- og fjármögnunarverkefni, endurskipulagningu fyrirtækja o.fl. beggja vegna Atlantsála.
„Það gleður mig að slást í hópinn með vinum mínum hjá BBA//Fjeldco og stuðla að frekari vexti starfseminnar í London. Ég hef lengi fylgst með íslensku viðskiptalífi og hef heillast af þeim krafti og hugviti sem þar býr. Lega landsins í norðri miðja vegu milli Ameríku og Evrópu gerir Ísland að ákjósanlegum upphafspunkti fyrir fjárfestingar á norðurslóðum,“ segir John Van de North.
Hann kemur frá Goodwin, bandarískri alþjóðlegri lögmannstofu í London þar sem hann var eigandi í einkafjármögnunarteymi stofunnar. Þar áður var hann eigandi hjá alþjóðlegu stofunum Kirkland & Ellis og O‘Melveny & Myers, og ráðgefandi hjá Sidley & Austin. Þá var hann einnig forstöðumaður lögfræðisviðs og viðskiptaþróunar fyrirtækis á sviði endurnýjanlegrar orku í Kaliforníu í Bandaríkjunum árin 2012-2017.
John er þar að auki einn stofnenda góðgerðarstofnunarinnar Girls are Investors (GAIN) í Bretlandi en tilgangur hennar er að auka þátttöku kvenna í stjórnun fjárfestinga.
„Það er gríðarlegur fengur fyrir BBA//Fjeldco að fá John til liðs við stofuna. Hann kemur inn með sérþekkingu og reynslu sem er ekki að finna á öðrum íslenskum lögmannsstofum og mun þannig styrkja þjónustu BBA//Fjeldco við bæði íslenska og erlenda viðskiptavini,“ segir Gunnar Þór Þórarinsson, forstöðumaður BBA//Fjeldco í London.
