Lilja Alfreðsdóttir settur ráðherra mun skipa Bergþóru Þorkelsdóttur dýralækni í embætti forstjóra Vegagerðarinnar. Þetta kemur fram í frétt Stundarinnar um málið.
Bergþóra stundaði nám í markaðsfræðum við Chartered Institute of Marketing í Bretlandi og nam rekstrar- og viðskiptafræði við Háskóla Íslands. Áður lauk hún kandídatsprófi í dýralækningum.
Bergþóra hefur starfað sem forstjóri ÍSAM ehf., framkvæmdastjóri Líflands og Kornax og hjá Fastus. Hún hefur setið í stjórn Samtaka iðnaðarins og í fulltrúaráði Samtaka atvinnulífsins. Nýlega tók hún svo sæti í stjórn Viðskiptaráðs Íslands.
Bergþóra mun taka við embættinu af Hreini Haraldssyni, en Hreinn hefur gegnt starfi vegamálastjóra síðan árið 2008.