*

þriðjudagur, 24. nóvember 2020
Erlent 17. nóvember 2020 10:44

Bréf Tesla skráð í S&P 500 vísitöluna

Hlutabréf Tesla verða skráð í S&P 500 vísitöluna í næsta mánuði. Hlutabréf fyrirtækisins hafa hækkað um tæplega 13% fyrir opnun markaða.

Ritstjórn
Elon Musk forstjóri og stofnandi Tesla.
epa

Rafbílaframleiðandinn Tesla verður á meðal þeirra fimm hundruð fyrirtækja sem tilheyra S&P 500 vísitölunni frá og með 21. desember næstkomandi. Í kjölfar fregnanna hafa hlutabréf rafbílaframleiðandans hækkað um tæplega þrettán prósent fyrir opnun markaða og eru nú í sögulegri hæð en hvert bréf kostar tæplega 460 dollara.

Tesla hefur hagnast á síðustu fimm ársfjórðungum en fyrirtæki þarf að hagnast fjóra fjórðunga í röð til þess að bréf félagsins geti verið skráð í téða vísitölu. Að mati S&P eru um 11 þúsund milljarðar dala af eignum sem fylgja vísitölunni. Því er líklegt að fleiri muni kaupa bréf Tesla en ella sem almennt myndi ýta undir verðhækkun.

Ekki liggur fyrir hvaða fyrirtæki verður tekið úr vísitölunni í stað Tesla. Gagnrýnendur hafa sagt að S&P sé að gera mistök með því að skrá Tesla í vísitöluna þar sem mikil áhætta fylgi fyrirtækinu. 

Stikkorð: S&P 500 Tesla