Brynja Baldursdóttir hefur verið ráðin forstöðumaður fyrirtækjasviðs Creditinfo. Hún tekur við starfi Samúels Ásgeirs White sem leitt hefur sviðið undanfarin ár. Hann hefur snúið sér alfarið að verkefnum fyrir Creditinfo á erlendum vettvangi.
Fram kemur í tilkynningu að Brynja starfaði sem forstöðumaður sölu Símans á einstaklingsmarkaði árin 2010 til 2012 og bar hún m.a. ábyrgð á sölustefnu fyrirtækisins. Árin 2005 til 2010 var Brynja í forsvari fyrir vefdeild Símans og á árunum 2000 til 2002 starfaði hún sem samstæðustjóri hjá OZ communications.
Brynja lauk prófi í véla- og iðnaðarverkfræði frá Háskóla Íslands árið 2000 og meistaragráðu í aðgerðagreiningu frá Georgia Institute of Technology í Atlanta í Bandaríkjunum árið 2003. Hún hefur setið í varastjórn Lífeyrissjóðs verkfræðinga frá 2013 og í stjórn Véla og verkfæra ehf. frá 2011.
Eiginmaður Brynju er Jón Guðni Ómarsson, framkvæmdastjóri hjá Íslandsbanka, og eiga þau tvö börn.
