Jerome Powell, seðlabankastjóri Bandaríkjanna, segir að þrálát verðbólga vestanhafs á fyrsta ársfjórðungi setji fyrirhugaðar vaxtalækkanir á árinu í uppnám.
Seðlabanki Bandaríkjanna gerði ráð fyrir þremur vaxtalækkunum á árinu en stýrivextir bankans eru 5,25% og hafa ekki verið hærri í 22 ár.
Í gærkvöldi sagði Powell að á meðan efnahagsumsvif vestanhafs séu enn mikil og verðbólgan helst þrálát sé ekki ástæða til að lækka vexti.
Undir lok síðasta árs gáfu hreyfingar á skuldabréfamarkaði til kynna að fjárfestar ættu von á allt að sjö vaxtalækkunum í ár, samkvæmt The Wall Street Journal.
Ef marka má hreyfingar á skuldabréfamörkuðunum nú hafa þær vonir dvínað allverulega.
S&P 500 lækkaði örlítið í gær eftir ummæli Powell og fór ávöxtunarkrafa á ríkisskuldabréfum til tveggja ára upp í 5% um stutta stund en krafan hefur ekki verið hærri síðan í nóvember í fyrra.