*

mánudagur, 18. janúar 2021
Innlent 28. nóvember 2020 14:14

Fjárfest í nýsköpun fyrir 17 milljarða

Meira hefur verið fjárfest í nýsköpun á Íslandi það sem af er ári en allt árið í fyrra. Þar af komu 12 milljarðar erlendis frá.

Ritstjórn
Þórdís Kolbrún Reykfjörð Gylfadóttir er ráðherra nýsköpunarmála, auk ferðamála og iðnaðar, í atvinnuvega- og nýsköpunarráðuneytinu.
Haraldur Guðjónsson

Af 17 milljörðum sem farið hafa í nýsköpunarverkefni á Íslandi á árinu hafa 12 milljarðar, eða 74%, komið frá öðrum löndum að því er Þórdís Kolbrún Reykfjörð Gylfadóttir ráðherra nýsköpunarmála segir frá í pistli í Morgunblaðinu.

Upphæðin sé þar með orðin meiri en allt árið 2019, en þó segir hún að um færri verkefni sé að ræða í ár en í fyrra, sem hún segir vísbendingu um að nýsköpunin sé komin yfir fyrstu stigin í vaxtaferlinu.

Sem dæmi um fyrirtæki sem hún nefnir að hafi sótt erlendar fjárfestingar á árinu eru Sidekicick Health, sem fékk þrjá milljarða, Controlant sem fékk tvo milljarða og Dohop sem fékk á annan milljarð.

Auk þess hafi yfir þrír milljarðar í  evrópskum þróunarstyrkjum runnið til íslenskra fyrirtækja, þar af 2,5 milljarðar til Svefnbyltingarinnar, 400 milljónir til Orf líftækni og loks 300 milljónir til Greenvolt, sem þrói rafhlöður með nanótækni.

Í fyrra hafi hins vegar 1,5 milljarðar runnið til íslenskra nýsköpunarfyrirtækja frá evrópskum þróunarstyrkjum, þar á meðal til EpiEnda, Oz, SagaNatura, Kerecis og Curio.