Eggert Þór Kristófersson forstjóri Festi fékk í heildina 73,4 milljónir króna í laun, hlunnindi og árangurstengdar greiðslur á síðasta ári, sem er aukning um tæplega 19% frá árinu áður þegar hann fékk í heildina 61,7 milljónir króna, að því er lesa má úr kynningu á aðalfundi félagsins .

Miðast greiðslurnar við afkomu ársins 2018, en eins og Viðskiptablaðið fjallaði um á sínum tíma var hann með 70,5 milljónir í heildina árið 2017, þar af 21 milljón krónur í árangurstengdar greiðslur, vegna afkomu ársins 2016, sem er litlu minna en hann fær nú.

Framkvæmdastjóri Krónunnar fékk svo í fyrra tvöfalt hærri bónus en aðrir framkvæmdastjórar hjá dótturfélögum Festi, eða sem jafngildir sex mánaða launum í stað þriggja mánaða launa. Gréta María Grétarsdóttir tók við stöðunni í septemberbyrjun 2018 , en hún var handhafi Viðskiptaverðlauna Viðskiptablaðsins og Frjálsrar verslunar fyrir hönd Krónunnar um síðustu áramót.

Eggert Þór fékk hins vegar jafngildi 5 mánaða kaupauka í fyrra, sem nam í heildina 23,4 milljónum króna, svo mánaðartekjur hans fóru úr ríflega 5,1 milljón árið 2018, í rétt rúmlega 6,1 milljón á síðasta ári.