Frumvarp um stjórn fiskveiða verður ekki lagt fram á þessu þingi. Þetta staðfestir Sigurður Ingi Jóhannesson sjávarútvegs- og landbúnaðarráðherra í samtali við Ríkisútvarpið.
Sigurður segir að ekki hafi náðst samkomulag um hver fari með forræði kvótans.
„Ég held að allir flokkar séu sammála um að þjóðin eigi auðlindina, ágreiningurinn snýst um hver fer með forræði á kvótanum, þar höfum við ekki náð því miður niðurstöðu, hvorki milli stjórnarflokkanna né inni á þingi og þannig er staðan,“ sagði ráðherrann.
Frumvarp um stjórn fiskveiða verður því ekki lagt fram nema forsendur breytist. Hins vegar verður frumvarp um veiðigjöld lagt fram við fyrsta tækifæri að sögn Sigurðar.
