Sjóðurinn GAMMA:Temple, í rekstri hjá GAMMA, var stofnaður um fasteignaverkefni sem snýst um að rífa gamla kirkju í Harlem í New York og breyta í ellefu hæða íbúðabyggingu.
Krikjan ber nafnið Baptist Temple Church og var áður sýnagóga. Verkefnið var unnið í samvinnu við kanadískt fjárfestingafélag. Samkvæmt heimildum Viðskiptablaðsins er nú unnið að því að rífa kirkjuna og stefnt að því að framkvæmdir við bygginguna sjálfa hefjist á þessu ári. Fjárfestingin Temple í verkefninu hleypur á nokkur hundruð milljónum króna.
Verkefnið var eina stór verkefni GAMMA í Bandaríkjunum sem komst á koppinn. Fyrirtækið opnaði skrifstofu í New York í byrjun árs 2017. Meðal annarra verkefna sem GAMMA hugðist koma á fót í Bandaríkjunum var fasteignasjóður í Flórída og sjóður sem hugðist sérhæfa sig í verkefnum tengdum sjávarútvegi. Þeir sjóðir fóru aldrei formlega af stað. Skrifstofunni í New York var lokað áður en Kvika eignaðist GAMMA formlega fyrr á þessu ári.
Sjá einnig: Ákærður fyrir tugmilljarða fjársvik
Skrifstofan í New York var hluti af útrás fyrirtækisins, sem hugðist hasla sér völl á erlendri grundu í kringum losun gjaldeyrishafta. GAMMA opnaði einnig skrifstofur í London og Sviss. Skrifstofunum í Sviss var lokað í byrjun árs 2018. Í kjölfarið lét Gísli Hauksson, fyrrverandi forstjóri fyrirtækisins, af störfum hjá GAMMA en Gísli hafði leitt útrás fyrirtækisins.
Sjá einnig: Vöknuðu upp við vondan draum
Við kaup Kviku banka á GAMMA var starfsemi félaganna í London sameinuð undir merkjum Kviku. Þann 30. september var greint frá því að sjóðurinn GAMMA:Anglia, sem stofnaður var árið 2017 um fasteignafjárfestingar í Bretlandi. hafði verið færður niður um nærri helming. Verkstjórn samstarfsaðila í Bretlandi mun hafa verið verulega ábótavant, kostnaður hafi verið vanmetinn auk þess að ekki fékkst leyfi frá skipulagsyfirvöldum fyrir fjölbýlishúsi sem til stóð að byggja.
N ánar er fjallað um málið í Viðskiptablaðinu. Áskrifendur geta nálgast blaðið undir Tölublöð , aðrir geta skráð sig í áskrift hér .
