*

þriðjudagur, 30. nóvember 2021
Innlent 9. júlí 2021 13:59

Grænn orkugarður á Reyðarfirði

Kannað verður kosti þess að framleiða rafeldsneyti með vetni og vonast er til að hægt verði að nota rafeldsneyti í skipasiglingum.

Ritstjórn
Anna-Lena Jeppsson, verkefnisstjóri hjá CIP , Jón Björn Hákonarson, bæjarstjóri Fjarðabyggðar og Ríkarður Ríkarðsson, framkvæmdastjóri Viðskiptaþróunar og nýsköpunar hjá Landsvirkjun, við undirritun viljayfirlýsingar
Aðsend mynd

Fjarðabyggð, Landsvirkjun og Copenhagen Infrastructure Partners (CIP) hafa undirritað viljayfirlýsingu um að meta kosti þess að þróa grænan orkugarð á Reyðarfirði. Þetta kemur fram í tilkynningu.

Í fyrstu verða kannaðir kostir þess að framleiða rafeldsneyti með vetni á Reyðarfirði en einnig verður farið í að skoða og greina möguleg samlegðaráhrif við aðra starfsemi á svæðinu. Þar verður meðal annars horft til möguleika á orkuskiptum í sjávarútvegi og landflutningum, endurnýtingu varma til húshitunar á Reyðarfirði og notkun súrefnis við landeldi á fiski. Auk þessa verða kannaðir kostir til að afla orku á svæðinu fyrir mögulega starfsemi í græna orkugarðinum.

„Við fögnum þessari viljayfirlýsingu um uppbyggingu umhverfisvænnar iðnaðarstarfsemi á Reyðarfirði. Um er að ræða spennandi verkefni og við erum stolt af því að horft sé til Fjarðabyggðar til uppbyggingar á slíkri starfsemi. Í Fjarðabyggð er öflugt atvinnulíf og með þróun græns orkugarðs verður hægt að auka enn frekar verðamætasköpun í sveitarfélaginu.

Það  er verulegur ávinningur fyrir allt samfélagið í að þróa nýjar lausnir í orkumálum og skapa þannig frekari tækifæri fyrir frumkvöðla til nýsköpunar og uppbyggingar nýrrar atvinnustarfsemi," segir Jón Björn Hákonarson, bæjarstjóri Fjarðabyggðar, í tilkynningunni.

Binda vonir við orkuskipti í skipasiglingum

CIP var stofnað árið 2012 af reynslumiklum stjórnendum úr danska orkugeiranum í samstarfi við danska lífeyrissjóðinn PensionDanmark. Sjóðir CIP eru með fjárfestingar um allan heim og eiga um 100 alþjóðlegir stofnanafjárfestar aðild að þeim.

„Baráttan við loftslagsvána kallar á þróun nýrra lausna sem gera orkuskipti möguleg og við viljum taka þátt í því. Vonir eru bundnar við að rafeldsneyti muni gera orkuskipti í skipasiglingum möguleg og við viljum kanna kosti þess að framleiða það hér á landi.

Það felast mikil tækifæri í því fyrir okkar samfélag, bæði frá umhverfis- og efnahagslegu sjónarhorni, ef við getum nýtt innlent og umhverfisvænt eldsneyti við fiskveiðar okkar og vöruflutninga. Þátttaka CIP í þessu verkefni er einnig mikilvæg því þau koma inn með mikla alþjóðlega þekkingu og reynslu af fjárfestingum í framleiðslu endurnýjanlegrar orku," segir Ríkarður Ríkarðsson, framkvæmdastjóri Viðskiptaþróunar og nýsköpunar hjá Landsvirkjun, í tilkynningunni.

Stikkorð: Landsvirkjun