Hagnaður Ísfélags Vestmannaeyja minnkaði milli ára og nam 39 milljónum dala í fyrra, sem samsvarar um 5,4 milljörðum króna á gengi dagsins. Félagið skilaði um 61 milljón dala hagnaði árið 2022 en helstu ástæður fyrir lækkun milli ára eru gagnvirðisbreytingar vegna vaxtaskiptasamninga og hlutabréfaafleiða.
Tekjur félagsins jukust töluvert á milli ára og námu 194 milljónum dala, sem samsvarar hátt í 27 milljörðum króna á gengi dagsins.
Mun það vera hækkun úr 164 milljónum dala árið 2022 en tekjuaukningin skýrist að mestu af sameiningu Ramma hf. og Ísfélagsins um mitt ár 2023.
Yfir sex milljarða hagnaður með Ramma
Sameiningu félaganna lauk 30. júní 2023 en þar af leiðandi er rekstur Ramma hf. fyrstu 6 mánuði ársins ekki meðtalinn í ársuppgjöri Ísfélagsins.
Í Pro forma reikningi sem birtist samhliða uppgjöri Ísfélagsins, þar sem rekstur félaganna tveggja er tekinn saman fyrir allt árið, er hagnaður samstæðunnar 45 milljónir dala eða sem nemur 6,2 milljörðum króna á gengi dagsins.
Rekstrartekjur samkvæmt Pro forma reikningi námu 232 milljónum dala árið 2023 sem samsvarar 32 milljörðum króna.
Greiða 2,1 milljarð í arð
EBITDA ársins 2023 hjá Ísfélaginu var 71 milljón dala eða um 34% af rekstrartekjum. Tekjur félagsins
Stjórn félagsins leggur til að greiddur verði arður að fjárhæð 2,1 milljarða króna á árinu 2024 vegna rekstrarársins 2023.
Heildareignir Ísfélagsins námu 804 milljónum Bandaríkjadala í lok ársins 2023, sem samsvarar um 111 milljörðum íslenskra króna á gengi dagsins.
Eignirnar skiptast í fastafjármuni að andvirði 663 milljónir dala og veltufjármuni að andvirði 141 milljóna dala.
Heildareignir félagsins jukust um 469 milljónir dala á milli ára vegna sameingar við Ramma.
Fastafjármunir jukust um 400 milljónir dala en kaup Ísfélagsins á 29% hlut í Austur holding hafði nokkur áhrif á hækkun fastafjármuna. Veltufjármunir hækkuðu um 69 milljónir dala milli ára.
„Í mars keypti félagið 29% hlut í eignarhaldsfélaginu Austur Holding, sem er stærsti eigandi í Ice Fish Farm, sem er laxeldisfyrirtæki á Austurlandi. Kaupin á hlutnum í Austur Holding jafngilda 16,4% hlut í Ice Fish Farm,” segir Stefán Friðriksson forstjóri í uppgjöri.
Í lok árs 2023 var eigið fé Ísfélagsins 554,2 milljónir dala sem er hækkun úr 229 milljónum dala árið áður. Eiginfjárhlutfallið var 68,9%.
Handbært fé í lok tímabilsins nam 44 milljónum dala.
Loðnubrestur mun hafa töluverð áhrif í ár
Stefán Friðriksson forstjóri Ísfélagsins segir í uppgjöri að loðnuvertíðin í fyrra hafi verið góð bæði aflabrögð og vinnsla.
„Framleiðsla loðnuhrogna var mikil á árinu, m. a. vegna þess að aflaheimildir voru auknar verulega þegar langt var liðið á vertíðina. Vegna þessa fór framboð á hrognum á Íslandi langt fram úr eftirspurn sem olli verðlækkun og birgðasöfnun.
Síldarveiðar gengu afar vel á árinu, veiðin var góð og stutt á miðin og fiskurinn góður.
Ísfélagið veiddi um 127 þúsund tonn af uppsjávarfiski á árinu og framleiddi um 32 þúsund tonn af frystum afurðum og 29 þúsund tonn samtals af mjöli og lýsi,” segir Stefán.
Í uppgjöri er þó gert ráð fyrir að loðnubresturinn í ár muni hafa talsverð áhrif á afkomu félagsins á yfirstandandi ári.
Félagið stendur þó í umtalsverðum fjárfestingum á árinu þar sem verið er að auka afköst fiskimjölsverksmiðjunnar í Vestmannaeyjum og undirbúa byggingu frystigeymslu á Þórshöfn.
Togarinn Sigurbjörg, sem er í smíðum í Tyrklandi, er síðan væntanlegur til landsins í maí.
„Allar þessar stóru fjárfestingar munu bæta reksturinn í framtíðinni auk þess sem félagið er áfram fjárhagslega afar sterkt til að takast á við frekari fjárfestingar og tækifæri á komandi árum,” segir í uppgjöri.