Umræða um leigumarkaðinn hefur verið áberandi síðustu misseri. Hagsmunasamtök hafa ítrekað bent á lakari kjör leigjenda þar sem leiguverð hafi vaxið upp úr öllu valdi. Það virðist þó ekki alls kostar rétt.

Sé rýnt í tölurnar sést að leiguverð hefur ekki haldið í ýmsar aðrar stærðir, t.d. fasteignaverð. Sé fjölbýli á höfuðborgarsvæðinu tekið sem dæmi hefur vísitala íbúðaverðs frá desember 2019 til mars 2023 hækkað um 50,2 prósent á meðan vísitala leiguverðs hækkaði um 16,8 prósent. Á föstu verðlagi hefur íbúðaverð hækkað um 22,4 prósent en leiguverð lækkað um 4,8 prósent.

Þá hefur leiguverð ekki þróast í takt við laun ef litið er á sama tímabil. Launavísitalan hækkaði um 31,2 prósent, um 6,9 prósent á föstu verðlagi og hefur leiguverð því sem hlutfall af launum lækkað um ellefu prósent.