*

fimmtudagur, 2. apríl 2020
Fólk 19. mars 2020 07:01

Nýr verkefnastjóri Jafnvægisvogar FKA

Thelma Kristín Kvaran hefur verið ráðin verkefnastjóri Jafnvægisvogar FKA.

Ritstjórn
Thelma Kristín Kvaran.
Aðsend mynd

Thelma Kristín Kvaran hefur verið ráðin verkefnastjóri Jafnvægisvogar FKA. Hún er starfandi stjórnendaráðgjafi hjá ráðgjafarfyrirtækinu Intellecta og hefur umtalsverða reynslu á sviði stjórnunar. Thelma er með B.Sc. í viðskiptafræði frá Háskólanum á Bifröst og M.Sc. í mannauðsstjórnun frá Háskóla Íslands. FKA greinir frá þessu í fréttatilkynningu.

Í tilkynningunni er Jafnvægisvogin lýst sem hreyfiaflsverkefni sem unnið sé í samstarfi við forsætisráðuneytið, Sjóvá, Deloitte, Árvakur og PiparTBWA. Tilgangur verkefnisins sé að auka jafnvægi kynja í efsta lagi stjórnunar fyrirtækja í íslensku viðskiptalífi og virkja íslenskt viðskiptalíf til að verða að fyrirmynd jafnréttis fyrir aðrar þjóðir.

„Thelma Kristín mun vinna náið með stjórnendum í fyrirtækjum, sveitafélögum og stofnunum og þjónusta atvinnulífið í gegnum störf sín fyrir Jafnvægisvogina. Stjórnendur í íslensku samfélagi eru að takast á við áskoranir þar sem Jafnvægisvogin er þarft verkfæri og góð leið til að dýpka skilningi á jafnréttismálum og auðvelda atvinnulífinu að verða við þeim kröfum sem hið opinbera regluverk setur okkur í málaflokknum,“ segir í tilkynningu FKA.

„Jafnvægisvogin er virkilega þarft verkefni og ég er full tilhlökkunar og þakklætis. Það er von mín að á komandi árum verði þetta verkefni hvatning til fyrirtækja og stofnana að sækjast eftir jöfnum áhrifum kvenna, því það er samfélagslegur ávinningur okkar allra," segir Thelma Kristín í tilkynningunni.