Yfirvöld í Bretlandi hafa gefið Redbird IMI, fjárfestingafélag sem Sheikh Mansour bin Zayed al-Nahyan varaforseti Sameinuðu arabísku furstadæmanna fer fyrir, aukinn frest til að róa áhyggjur Breta um fyrirhuguð kaup félagsins á Telegraph samstæðunni.
Fjárfestingafélagið lagði fram 600 milljón punda kauptilboð í fjölmiðlafyrirtækið sem samsvarar um 104 milljörðum króna á gengi dagsins.
Redbird IMI er í eigu Sheikh Mansour og bandaríska fjárfestingafélagsins Redbird Capital Partners en áhyggjur breskra yfirvalda snúast að því að sala fjölmiðilsins til varaforseta SAF gæti verið skaðleg fyrir frjálsa fjölmiðlun í landinu.
Lucy Frazer, menningarráðherra Bretlands, gaf félaginu frest til dagsins í dag til þess að róa áhyggjur yfirvalda um hvernig eignarhaldinu verður háttað. Þeim fresti hefur nú verið seinkað til þriðjudagsins í næstu viku.
Stjórnarfrumvarp hefur verið lagt fram í breska þinginu sem myndi koma í veg fyrir söluna en verði frumvarpið að lögum bannar það eignarhald erlendra ríkja á fjölmiðlum í landinu.
Lloyds banki tók yfir fjölmiðlasamstæðuna eftir að eigendur þeirra, Barclay-fjölskyldan, náði ekki að komast að samkomulagi um endurskipulagningu á 1 milljarða punda skuld. Fjárfestingabankinn Goldman Sachs sér um uppboðið á Telegraph.
Viðskiptablað the Guardian greinir frá því að ef Redbird verður meinað að kaupa fjölmiðlasamstæðunni er fjárfestingafélagið DMGT, sem á meðal annars Daily Mail, líklegt til að kaupa Telegraph.
Sir Paul Marshall, meðeigandi GB News sjónvarpstöðvarinnar í Bretlandi, fer fyrir DMGT-hópnum.
Rupert Murdoch er síðan sagður áhugasamur um að kaupa tímaritið Spectator sem er hluti af fjölmiðlasamstæðunni.