Tíu starfsmönnum Símans og dótturfélaga var sagt upp störfum í dag og í gær. Uppsagnirnar voru ekki bundnar við eitt svið heldur starfaði fólkið víðs vegar í samstæðunni, en flestir koma frá Símanum.
Það sem af er ári hefur starfsmönnum fyrirtækjasamstæðunnar fækkað um 10% vegna hagræðingar og sölu dótturfélaganna Staka og Talenta. Alls hætta fimmtán starfsmenn um mánaðarmótin, þar af eru fyrrgreindir tíu og fimm aðrir sem hætta vegna aldurs.
Nokkuð hefur verið um uppsagnir hjá samstæðu Símans það sem af er ári. Í lok febrúar var þrettán starfsmönnum markaðs- og vefdeildar fyrirtækisins sagt upp til viðbótar við fjórtán starfsmenn sem sagt var upp í lok janúar.
Aðspurð um hvort frekari uppsagna væri að vænta hjá félaginu sagði Gunnhildur Arna Gunnarsdóttir, upplýsingafulltrúi Símans, að fyrirtækið þurfi að stilla sig af eftir vexti á hverjum tíma. „Hvert spor er tekið með það í huga að fjöldi starfsmanna sé í samræmi við markmið um gæði þjónustunnar og að viðskiptavinum sé boðið samkeppnishæft verð,“ segir hún.
