Meirihluti Sjálfstæðisflokksins í bæjarstjórn Reykjanesbæjar er fallinn samkvæmt skoðunarkönnun Félagsvísindastofnunar sem unnin var fyrir Morgunblaðið .
Flokkurinn fengi 37,1% atkvæða en fékk 52,8% í sveitarstjórnarkosningunum árið 2010. Því yrðu aðeins 4 sjálfstæðismenn í bæjarstjórn samkvæmt könnuninni en þeir eru sjö í dag. Alls eru ellefu bæjarfulltrúar í bæjarstjórn Reykjanesbæjar.
Í samtali við Morgunblaðið segist Árni Sigfússon bæjarstjóri taka þessum tölum mjög alvarlega.
Meðal skýringa á fylgitapi Sjálfstæðisflokksins er stofnun flokksins Frjáls afls, sem fengi 10,3% samkvæmt könnuninni. Gunnar Þórarinsson, bæjarfulltrúi Sjálfstæðismanna í Reykjanesbæ, leiðir lista Frjáls afls. Gunnar hefur lýst því yfir að aðal stefnumál flokksins er að taka skuldamál Reykjanesbæjar föstum tökum og snúa við hallarekstri bæjarsjóðs.
Samkvæmt úttekt Viðskiptablaðsins í haust á fjárhag sveitarfélaga var Reykjanesbær í öðru sæti yfir skuldugustu sveitarfélög landsins í hlutfalli af tekjum. Hlutfall skulda af tekjum var þá 270 prósent.
Samkvæmt könnuninni fengi Samfylkingin 16,4%, Píratar 14,9%, Frjálst afl 10,3%, Bein leið 9,9%, Framsóknarflokkurinn 9,9% ef kosið væri nú.
