Björn Brynjúlfsson, formaður Samtaka gagnavera, segir það ákaflega sérstakt að forsætisráðherra tali á erlendum vettvangi eins og það eina sem gagnaver á Íslandi gera sé að þjónusta aðila sem grafa eftir rafmyntum.
Katrín Jakobsdóttir forsætisráðherra var í viðtali á Financial Times um matvælaöryggi og orkumál. Katrín sagði gagnaver vera taka mikilvæga orku frá heimilum og öðrum iðnaði. FT hefur eftir Katrínu að Bitcoin sé vandamál víða um heim en gagnaver á Íslandi nota töluvert mikið af grænni orku landsins.
„Bitcoin og rafmyntir, sem nota mikið af orkunni okkar, eru ekki hluti af okkar markmiðum,“ sagði Katrín.
Árleg fjárfesting um milljarður
Björn segir að að þetta sé ekki í samræmi við þróunina og stöðu gagnaversiðnaðar hér á landi sem sinni í dag fjölbreyttri þjónustu.
„Það eru allir núna að vinna að því að byggja upp vinnslugetu fyrir gervigreind og slíkt. Öll þessi rafmyntaumræða er smá partur af fortíðinni,“ segir Björn.
Uppbygging gagnavera hefur verið mikil hérlendis undanfarin ár og árleg fjárfesting í geiranum nemur milljörðum króna. Þá eru áform um milljarða fjárfestingar til viðbótar á næstu misserum.
Helstu tæknifyrirtæki heims á borð við Google, Microsoft og Meta hafa komið sér fyrir á hinum Norðurlöndunum en þar hefur uppbygging gagnavera átt sér stað síðastliðinn áratug með stuðningi þarlendra stjórnvalda.
Yfirlýst markmið íslenskra stjórnvalda eða auka erlenda fjárfestingu hérlendis. Spurður um hvort ummæli forsætisráðherra í Financial Times gætu haft neikvæð áhrif á slíkt fyrir gagnaver segir Björn stöðugleika mikilvægan fyrir geirann.
„Ég held það gríðarlega mikilvægt þegar það koma erlendar fjárfestingar inn til landsins að það ríki ákveðinn stöðugleiki,“ segir Björn.
„Ég held að almennt séu fjárfestar í gagnaversiðnaði hér með þá sýn að veita fjölbreytta þjónustu til flóru af kúnnum sem eru í alls kyns starfsemi þó að meginþunginn sé gervigreind sem er í miklum vexti þessa dagana.“
Viðskiptavinir gagnavera á Íslandi eru m. a. innlend og erlend fjármálafyrirtæki, netfyrirtæki, veitu- og innviðafyrirtæki, aðilar sem standa að rekstri gervitungla, fyrirtæki í lyfjaiðnaðinum, bílaframleiðendur og upplýsingatæknifyrirtæki.
„Fyrir gagnaver eru þrír lykilþættir sem skipta nánast öllu máli. Það eru nettengingar og öryggi á þeim. Það eru orkumál, aðgengi að orku og ekki skemmir fyrir ef orkan er græn. Svo er það stöðugt viðskiptaumhverfi sem hægt er að reiða sig á,“ segir Björn.
„Það hefur verið á brattann að sækja hjá okkur á fleiri en einu sviði hvað þetta varðar,“ segir Björn að lokum.