Í janúar jókst velta í smásöluverslun hér á landi líkt og hefur átt sér stað undanfarna mánuði. Þó dróst saman fata- og skóverslun ef horft er til janúar í fyrra.
Jafnframt hefur verðlag farið lækkandi í öllum verðflokkum sem mæling Rannsóknarseturs verslunarinnar nær til, nema áfengis, en það hækkaði þó einungis um 0,5% frá því fyrir ári síðan.
Verð lækkar í dagvöruverslunum
Jókst velta í stærsta flokknum, dagvöruverslun um 4,3% frá janúar fyrir ári síðan og um heil 7,5% ef leiðrétt er fyrir verðlagi ásamt daga- og árstíðabundnum þáttum. Var varðið á dagvöru jafnframt 1,3% lægra en fyrir ári síðan.
Áfengissala jókst þrátt fyrir verðhækkunina svo um 5% milli ára.
Rúmlega 12% samdráttur í fataverslun
Janúarútsölur virðast ekki hafa aukið fatasöluna mikið, en veltan dróst saman um 12,1% á breytilegu verðlagi, en jafnframt fækkaði fataverslunum um áramótin sem setrið telur geta haft áhrif. Verð á fötum var hins vegar 2,9% lægra en fyrir ári síðan.
Raftæki lækkuðu töluvert í verði í útsölum í janúar og jókst salan á þeim einnig. Lækkaði verð á raftækjum eins og sjónvörpum, hljómflutningstækjum um 14,5% milli ára þó veltan héldist sú sama, en verðlækkun stærri heimilistækja nam 9% meðan veltan jókst um 23,8%.
Fimmtungsaukning veltu hjá byggingavöruverslunum
Jafnframt jókst velta byggingavöruverslana um rúmlega fimmtung, eða 20,2% milli ára.
Greiðslukortavelta heimila hér innanlands var 9% meiri í janúar en í sama mánuði fyrir ári, en kreditkortavelta Íslendinga erlendis jókst um 17,6% milli ára, og nam hún 7,1 milljarði króna. Á meðan jókst greiðslukortavelta ferðamanna hér á landi um 49% frá síðasta ári.