Ársverðbólga í Bretlandi mældist 3,2% í marsmánuði sem er lækkun úr 3,4% milli mánaða. Hagfræðingar og greiningaraðilar höfðu spáð því að verðbólgan yrði í kringum 3,1% en samkvæmt viðskiptablaði The Guardian flækir þetta stöðuna örlítið fyrir Englandsbanka.
Verðbólgumælingin dregur úr væntingum um að bankinn muni lækka vexti fyrir sumarið en stýrivextir bankans eru í 5,25%.
Ef marka má hreyfingar á peningamörkuðum búast fjárfestar við fyrstu vaxtalækkun í september eða nóvember. Fyrir viku síðan stóðu væntingar um vaxtalækkun í júnímánuði.
Jeremy Hunt fjármálaráðherra Bretlands sagði verðbólgumælinguna þó sýna að verðbólgan væri á niðurleið enda hefur hún ekki verið lægri í næstum tvö og hálft ár.
Kjarnaverðbólga, sem undanskilur sveiflukennda vöruflokka í matvæla- og orkugeiranum, lækkaði úr 4,5% í 4,2%
