Kreditkortafyrirtækin Visa og Mastercard hafa náð samkomulagi við samtök verslunareigenda vestanhafs eftir næstum tvo áratugi af málaferlum.
Samkvæmt The Wall Street Journal mun færslugjaldið sem leggst á fyrirtæki fyrir að taka á móti kreditkortum lækka um 0,04% og haldast óbreytt næstu fimm árin.
Gjaldið sveiflast eftir bönkum og kreditkortafyrirtækjum en samkvæmt WSJ er meðalfærslugjald um 2%.
Samkomulagið er einnig sagt gefa verslunareigendum meiri svigrúm til að ákveða hvaða kortum þeir taka við og þeir geta þá leiðbeint viðskiptavinum sínum til að nota kort sem eru með lægri færslugjöldum.
Alríkisdómari í New York ríki þarf að samþykkja samkomulagið áður en það kemur til lækkunar á færslugjöldum.
