Samanlögð afkoma stærstu líkamsræktarstöðva á Íslandi; World Class, Hreyfingar, Reebok Fitness, Sporthússins auk CrossFit Reykjavíkur nam 721 milljón króna á síðasta ári. Á árinu 2018 nam afkoman 665 milljónum og jókst um ríflega átta prósent milli ára.

Öll félögin skiluðu jákvæðri rekstrarafkomu en World Class hagnaðist mest, um 562 milljónir sem er tæplega 80% af heildarafkomu félaganna fimm. Rekstrartekjur félaganna námu um sex milljörðum króna árið 2019 en tæplega 5,8 milljörðum árið áður. Rekstrartekjur World Class voru tæplega 3,8 milljarðar á síðasta ári.

Af áðurnefndum félögum hefur arðsemi eigin fjár verið mest hjá CrossFit Reykjavík á síðustu tveimur árum eða 92% að jafnaði. Afkoma félagsins á þeim árum var jákvæð um 72 milljónir króna. Næstmest var arðsemi eigin fjár hjá World Class eða 41% að meðaltali. Þess ber að geta að arðsemi Sporthússins var yfir 110% árið 2019 en félagið var með neikvætt eigið fé árið 2018 og því með neikvætt hlutfall á því ári.

Ef litið er til jákvæðra stærða var hlutfallið lægst hjá Reebok Fitness eða níu prósent á þessum tveimur árum. Heildareignir þessara fimm félaga voru tæplega sjö milljarðar króna í lok árs 2019 og jukust um milljarð milli ára. Eignir World Class námu um sex milljörðum eða 86% af samtölunni. Eignir Hreyfingar námu 515 milljónum.

Nánar má lesa um málið í Viðskiptablaðinu. Áskrifendur geta nálgast blaðið undir Tölublöð , aðrir geta skráð sig í áskrift hér .