Hrafnarnir sáu að írska ríkið seldi fimm prósent af eign sinni í írska bankanum Allied Irish Banks í vikunni. Hluturinn var seldur í lokuðu útboði sem hófst eftir lokun markaða á mánudag. ­Afslátturinn í útboðinu var 6,5% miðað við markaðsgengi bankans áður en ráðist var í útboðið. Gengi hlutabréfa bankans hækkaði svo á ný eftir að útboðinu lauk. Hrafnarnir hafa heimildir fyrir því að hjálparsamtökin Hagfræðingar án landamæra hafi nú þegar sent þingmennina Kristrúnu Frostadóttur og Björn Leví Gunnarsson á vettvang útboðsins til að meta tjón írska ríkisins og þegna landsins. Vafalaust leggja þessir færustu sérfræðingar þjóðarinnar til að írska þjóðin leggist í naflaskoðun og stofni fjölda þingnefnda til að rannsaka söluna. En sem stendur hefur Páll Magnússon ekki tjáð sig um málið og því geta hrafnarnir ekki frætt lesendur sína um hvort vinur hans hafi tekið þátt.