Frá því að Kringlan var opnuð árið 1987 hafa tæplega 125 milljónir gesta lagt leið sína þangað. Árlega eru það um fimm milljónir gesta. Þetta kemur fram í nýju afmælisriti sem Kringlan gaf út í tilefni af 25 ára afmæli verslunarstaðarins.
Bókin er gefin út í samstarfi við Almenna bókafélagið og Sigurður Már Jónsson ritstýrir bókinni. Fram kemur í fréttatilkynningu að Kringlan hafi verið fjölsóttasti verslunarstaður Íslendinga í aldarfjórðung en í dag eru þar yfir 170 rekstrareiningar.
„Bygging hennar er öflugur vitnisburður um stórhug og djörfung í viðskiptum sem á sér fáar hliðstæður hér á landi. Með sanni má segja að með opnun Kringlunnar hafi hafist nýr kafli í verslunarsögu þjóðarinnar en rekstur Kringlunnar hefur reynst sérlega farsæll. Í Kringlunni starfa nú ríflega þúsund manns. Því er óhætt að segja að hún sé samfélag út af fyrir sig og rúmast þar nánast allar starfsstéttir, svo sem bókasafnsfræðingar, úr og gullsmiðir, læknar, kokkar, afgreiðslufólk, þjónar, ræstitæknar og sjúkraþjálfarar.
Kringlan hefur vaxið úr því að vera verslunarmiðstöð í það að verða verslunar, menningar og mannlífsmiðpunktur þar sem saman fer fjöldi verslana, fjölbreytt þjónusta, kvikmyndahús, leikhús og bókasafn“, segir í fréttatilkynningunni.