Fyrsta skóflustungan að að nýrri kersmiðju Alcoa Fjarðaráls við Reyðarfjörð var tekin í dag. Þetta kemur fram í tilkynningu frá félaginu. Stefnt er að því að hún verði tilbúin í ársbyrjun 2012.
Heildarfjárfesting vegna kersmiðjunnar er áætluð um 3,5 milljarðar króna og munu að jafnaði 60-80 vinna við byggingu hennar en 160 manns þegar framkvæmdir standa hæst. Rekstur kersmiðjunnar mun skapa um 70 ný störf til frambúðar. Þetta er til viðbótar þeim 800 störfum sem þegar eru til staðar á álverssvæðinu við Reyðarfjörð.
Verkfræðistofan Hatch hefur umsjón með byggingunni fyrir Fjarðaál í samstarfi við verkfræðifyrirtækið HRV. Ýmsir fleiri innlendir aðilar munu koma að verkinu. Samið hefur verið við Tandraberg á Eskifirði um jarðvinnu við kersmiðjuna og verið er að ganga frá samningum við aðra verktaka um næstu áfanga verksins.
Alls 336 ker í álverinu
Í tilkynninu segir að kersmiðjan skiptist í þrjá hluta, þ.e. kerfóðrunarbyggingu, kerbrotabyggingu og skrifstofubyggingu. Flatarmál bygginganna verður samtals rúmlega fjögur þúsund fermetrar. Ál er framleitt í 336 kerum í álveri Fjarðaáls og þau þarf að endurnýja á 5-7 ára fresti. Í nýju kerfóðrunarbyggingunni verður mögulegt að fóðra þrjú ker í einu. Þar verður einnig svæði til að kæla ker, viðgerðaraðstaða og geymslusvæði fyrir ýmsan búnað. Í kerbrotabyggingunni verða kerin hreinsuð og kerbrotunum komið fyrir í gámum. Þau verða send í endurvinnslu til Bretlands þar sem þau enda sem hráefni í sement.
